Supriya Sule : सुप्रिया सुळे हर्षवर्धन पाटलांसाठी थेट मैदानात, माझ्या मतदारसंघात कुणालाही धमकी दिली तर तो प्रकार सहन केला जाणार नाही !

सुळेंची अजित पवार गटाला थेट इशारा

पुणे - बारामती लोकसभा मतदारसंघातील लढत शरद पवार गट विरुद्ध अजित पवार गटामध्ये होणार झाले आहे. त्यामुळे येथील राजकीय वातावरण तापायला सुरुवात झाली आहे. बारामतीचा गड कोणत्याही परिस्थितीत राखायचाच त्या इच्छेने शरद पवार आणि सुप्रिया सुळे हे दोघेही आता प्रचाराच्या मैदानामध्ये उतरले आहे. बारामतीमध्ये सुनेत्रा पवार (Sunetra Pawar) यांची उमेदवारी निश्चित झाल्यानंतर अजित पवार (Ajit Pawar) यांनी आपल्या 'दादा' स्टाईलने राजकारण करण्यास सुरुवात केली आहे. याचाच एक भाग म्हणून बारामती मतदारसंघातील शरद पवार ( Sharad Pawar) समर्थकांवर दबाव आणण्याचा प्रकार चालू असल्याची चर्चा आहे. त्यामुळे शरद पवार यांनी गुरुवारी लोणावळ्यामध्ये अजित पवार गटाच्या सुनील अण्णा शेळके यांना मर्यादेत राहा,नाहीतर माझं नाव शरद पवार ते लक्षात ठेवा; असा थेट इशारा दिला आहे. यानंतर सुप्रिया सुळे (Supriya Sule) यांनी देखील इंदापूरमध्ये सुरू असलेल्या राजकीय दादगिरी विरोधात आता आक्रमक भूमिका घेतली आहे. काही दिवसांपूर्वी हर्षवर्धन पाटील यांच्यावर अजितदादा गटाच्या स्थानिक पदाधिकाऱ्याने आक्षेपार्ह भाषेमध्ये टीका करत त्यांना धमकी दिली होती. त्याच कारणावरून सुप्रिया सुळे यांनी अजित पवार गटाला लक्ष्य करत चांगलेच सुनावले आहे.

सुप्रिया सुळे यांनी इंदापूरमधील सभेत अजित पवार गटाच्या कार्यकर्त्यांना खणखणीत भाषेत इशारा दिला आहे. त्या म्हणाल्या की, महाराष्ट्राच्या राजकारणाला दृष्ट लागली आहे. लोकशाही नाही, तर दडपशाही पद्धतीने राजकारण चालू आहे. हर्षवर्धन पाटील यांच्यासारख्या ज्या व्यक्तीने आयुष्य राजकारणामध्ये घालवले, त्या माणसाला धमकी देणे हे दुर्दैवी आहे. यापूर्वी असे राजकारण कधीच झाले नव्हते. गृहमंत्री असतानाही भीती राहिली नाही. हर्षवर्धन पाटील हे सन्मानीय व्यक्ती असून बारामती मतदारसंघात कुणालाही धमकी दिली तर तो प्रकार सहन करून घेतला जाणार नाही. अदृश्य शक्तीने महाराष्ट्रामधील राजकारणाला दृष्ट लावली आहे. आम्ही सर्व एकत्र असताना कुणी देखील कुणाला धमकी दिली नाही. बारामती मतदारसंघात पहिल्यांदाच मी धमकी दिल्याचा प्रकार ऐकत आहे. तर मी बारामती लोकसभा मतदारसंघाची प्रतिनिधी आहे. त्यामुळे येथील मतदारसंघातील लोकांची जबाबदारी माझी आहे, आणि माझ्या मतदारसंघात कुणाला देखील धमक्या दिल्या जात असतील तर सुप्रिया सुळे ताकदीने उतरल्या शिवाय राहणार नाही, असे त्या म्हणाल्या आहे.

लग्नाच्या मंडपात सुळे आणि हर्षवर्धन पाटलांची भेट

काही दिवसांपूर्वी माळशिरस तालुक्यातील नातेपुतेमधील एका लग्न समारंभात हर्षवर्धन पाटील आणि सुप्रिया सुळे यांची भेट झाली होती. त्यादरम्यान या दोघांनी एकमेकांच्या शेजारी बसून गप्पा मारल्या होत्या. सुप्रिया सुळे आणि हर्षवर्धन पाटील यांच्या भेटीमुळे बारामती मतदारसंघातील राजकीय समीकरणे बदलणार का ? अशी चर्चा राजकीय वर्तुळात रंगली आहे.